ضحايا ذئاب العصر
مشكلة يعاني منه المجتمع العربي و الخليجي بالأخص صداقة البنت بالشاب...
موضوع حبيت اشارككم فيه نبي نعرف اسبابه و مشاكله و خطوراته و من الغلطان و من يتحمل النتيجة و من المسؤول و شنو نهاية هالعلاقات
فوق ال 85% من هذي العلاقات إللي اكثرها يبتدي بها الشاب عن طريق الترقيم في المولات و الأماكن العامة او عن طريق الإنترنت بدافع التسلية فقط
و الضحية في النهاية البـــنــــــت
هل البنت ممكن تكون بهذي البلاهة او السذاجة انها تصدق كلمات يقول لها الشاب كلمات تخدع كلمات تمر في اذنها مثل العسل إللي مخبي داخله سم كلمات مثل "احبج" "شنو ممكن اسوي بدونج" "العيشة بدونج عذاب"
و هل هي غبية لما يقنعها الشاب ان نهاية العلاقة الزواج من يرضاها و من بياخذ وحدة كلمت واحد و من الممكن انها تكلم غيره
ما تستغربون انه الموضوع وايد ينطرح و البنات يسمعونه و يسمعون قصص ضحايا الذئاب و معا هذا تلقينها عادي عندها تكلم الشاب
لكن هل تخلو الغابات من الحياية
مب يمكن يكون العكس البنت هي إللي تجذب ع الشاب معا انه الموضوع غريب للبعض... لكن ولا شي مستحيل
الموضوع كله بالنسبة لي جريمة فيها جاني و فيها مجني عليه فمن الجاني و من المجني عليه
اسئلة تدور في بالي ويمكن بال الكثير
من المسؤول عن هذي العلاقات
هل هو تقليد الشاب العربي لما يفعله الغرب معا ان العلاقات عادية في الغرب يعني الواحد لما بيكلم وحدة هناك ذيج تدري انه العلاقة ما بتدوم على عكس إللي عندنا في وعود بالزواج و هذي اكبر غلط يسويه الشاب ما يدري كلمة منه شنو تسوي بالبنت...
قصص الحب إللي بعضها مترجمة باللغة العربية و إللي تنبت فكرة البوي فريند و الغيرل فريند ( الحبيب و الحبيبة) عند بعض الفتيات امر عادي و لا بد منه في عصرنا الحديث
او هل هو من شدة خوف الأهل على ابنائهم
و من الأهل و شنو دورهم في الموضوع
بعض الأهالي عندهم انه البنت ممنوع منعا باتا تكلم شاب لكن عندهم عادي الشاب يكلم بنات يعني واحد ما يرضى بنته تكلم واحد لكن لما ولده يكلم وحدة عنده شي عادي و ماعنده لا حول له و لا قوة في الموضوع...
زين يا اخي الأب لما ولدك بيروح يكلم, بيكلم من مثلا اكيد بيكلم وحدة من البنات وحدة بالنسبة له مصيدة قوطي بيبسي لما يخلص منه يرميه هل ترضاها على بنات الناس بالضياع
و ليش لما الشاب بيترك البنت لما اهلها يدرون بالموضوع هي تتحمل كل المسؤولية إذا كانت في علاقة يعني كان في طرفين في الموضوع يعني لا بد من الطرفين تحمل المسؤولية التامة.... ليش الشاب بكل سهولة يطلع من الموضوع معا انه هو في اغلب الحالات الجاني
انتوا شرايكم :
من السبب ؟
و من الغلطان؟
و من الضحيه؟
و من يتحمل المسؤولية في النهايه؟
تحياتي،،،